Sjáðu til þess að eignin þín sé skínandi hrein

Fimm stjörnu gestrisni byggir fyrst og fremst á miklu hreinlæti. Grunnreglur gestgjafa gera ráð fyrir því að allar skráðar eignir á Airbnb séu hreinar og lausar við heilsuvá þegar gestir innrita sig. Gestgjafar með góð ferli fyrir ræstingar ná mestum árangri.

Hvort sem þú sérð um eigin ræstingar eða kaupir slíka þjónustu er mikilvægt að eignin sé alltaf vel þrifin milli allra gesta.

Ef gestir koma að óhreinum diskum í vaskinum eða hárum inni á baðherbergi getur það skemmt fyrir dvöl þeirra. Það getur svo leitt til neikvæðrar umsagnar eða jafnvel orðið til þess að gestirnir fari fyrr.

Ef þú kaupir ræstingaþjónustu skaltu fara einu sinni í gegnum ræstingaferlið á eigin spýtur þannig að þú vitir nákvæmlega hverju þurfi að sinna. Gættu þess að gefa nægan tíma fyrir góðar ræstingar milli bókana. Komdu þér upp varaáætlun eða hafðu annan ræstitækni til taks ef eitthvað skyldi koma upp á.

Fylgdu þessum ábendingum frá öðrum gestgjöfum þegar þú gengur frá skipulaginu:

• Taktu af rúmunum og byrjaðu á því að setja í eina þvottavél þannig að þú hafir nægan tíma til að þvo nokkrar vélar til viðbótar ef þörf krefur.
• Þrífðu og hreinsaðu ryk af öllum yfirborðum og passaðu vel upp á mikið notaða fleti, svo sem fjarstýringar og hurðarhúna.
• Búðu um rúm, skiptu út handklæðum, komdu skrautpúðum og ábreiðum fyrir og farðu yfir með límrúllu ef þörf krefur.
• Opnaðu gluggana ef veður leyfir á meðan þú sinnir hreingerningum til að lofta út.
• Endaðu á því að sópa og moppa gólf til að hreinsa ryk eða óhreinindi.

• Allir fletir eiga að vera þrifnir og ryk hreinsað.
• Öll gólf eiga að vera ryksuguð eða sópuð og moppuð.
• Öll svæði eiga að vera laus við skordýr, meindýr, kóngulóarvefi, myglu og bletti.
• Öll rúmföt og handklæði eiga að vera hrein, nýþvegin og laus við bletti.
• Búa á um öll rúm, hrista upp í sængum og koddum og fara yfir með límrúllu.
• Öll salerni, vaskar, sturtur og baðkör eiga að vera þrifin og sótthreinsuð.
• Fylla verður á allt sjampó, líkamssápu, handsápu og uppþvottalög.
• Allir persónulegir munir eru geymdir þar sem ekki sést í þá.
• Allir diskar, eldunaráhöld og eldhúsáhöld eru hrein og ganga á frá þeim.
• Öll eldhústæki, þar með talinn ísskápur, eldavél og ofn, eiga að vera hrein og tilbúin til notkunar.
• Fara verður út með allt sorp.
• Eignin á að ilma af ferskleika.